Create your Account
شركة جريس لاند لخدمات الشحن
شركة جريس لاند لخدمات الشحن
الطيب عبد الماجد يكتب : يضحك السمك ….
- Auth admin
- 09 May, 2025
- 81
شركة شحن
بحكي لي جعفر صاحبي قال لي زمان كان معانا واحد في المدرسة إسمو ( مامون ) بقولو ليهو( سفاري ) ما عارف لييي
المهم ( مامون ) دا أحسن زول بشف في العالم ….!!
قال الزول دا بحرك ( السوادة ) الفي العين دي أي حتة عايزا
تلقط الدايراهو وتجي راجعة …!!
( واي فاي )
الظاهر طور ( القرنية ) فصارت لا مركزيه ….!!
وأصلو ما بقعد جنب زول بليد …!!
بحدد هدفو من البدايه وهذه تحسب له …
لكنه يقوم بتعويض ذلك خارج فناء الفصل
متابع ليك ( الرمتالة ) ديل من تلتين الفصل وإنت ماشي …
يوم النتايج مش بذيعو الأول منو كدا ماعارف
والتاني والتالت
لحدي العاشر ولحدي العشرين بعد داك الأستاذ بتعب
بقول الإسم بس …!!
أها هو من الجماعة المابقولو ترتيبم ديل
( لاريد لا غرام لا خطوبة ….. إسم بس …)
قال لي عندنا أستاذ بطنو طااامة كدا بعد التلتين ولا بقول إسم الأبو ذاتو ….
بشبكم ليك على …!! عادل ….!!! السر ….!! حواية
( مرات ناس ( السر ) ولا بستلموها )
( حديد لاقى حديد )
لكنه ( مامون ) يمتلك هذه المهارات الفردية في الشف والنقل الجماعي
وقد ظهرت هذه الموهبة جلية في اختبار جغرافيا
كدا جاب فيهو ٢٧ / ٣٠ وكانت حالة نادرة تستوجب الدراسه والوقوف
لأنو قياساً على قدراته الفنية ( مامون ) دا خمسة ما بجيبا ..
راجعو ورقتو عشرة مرات وجات النتيجه positive
ياها ورقتو وإجاباتو
الاستاذ ( شفت ) كدا بدا التحقيق في كيفية الحصول على هذه النتيجة
اكتشف إنو ( مامون ) نقل إجابات جارو بي ( ضبانتا ) …
جارو دا إسمو ( أكرم ) من الصفوة
جعفر قال لي هو يتخيل لي مصطلح بي ( ضبانتا ) دا جابو الزول دا
لأنو لما قارنو الورقتين لقو نفس الأخطاء بتاعة ( أكرم ) دا
هي نفسها أخطاء المامون
وكانت متمثله في أين يقع نهر السوباط ؟؟
وماهي عاصمة موريتانيا…؟؟
وماهو مناخ البحر المتوسط …!؟؟
وطبعا الأخير حالة كونه ( حار جاف صيفاً دافئ ممطر شتاءاً )
دي كلاب الحلة عارفنها …
اها أظنو ( أكرم) دا قدر ما ( ضارا ) منو الورقة زولك كان قادر على الوصول بهذه المقدرات المهولة في تحريك العين بدل الدماغ
واضح إنو عندو طفرة جينيه في الشبكية ..!!
أكرم وكت زهج بقى يتعمد يكتب إجابات غلط
( عليا وعلى أعدائي )
كتب ليهو عاصمة موريتانيا …هي أكرا
زولك طوالي لصقا ( أكرا ) وما شافا كويس كتبا ( أكلا )
مافرقت هو أصلًا ( ماكلا ) من جارو
أها في الإجابة بتاعة البحر المتوسط دي
كتب ليهو. ( قلم ) جاف صيفاً دافئ ممطر شتاءاً )
مستبدلًا كلمة ( حار جاف ) بي ( قلم جاف )
طبعا أكرم دا مع الشطارة العليهو دي زول منظم كدا ومجتهد علبة الهندسة دي تلمع … والكتب مرتبة والكراسات مكتوب فيها الاسم دا كيف
( حافلة بس )
( مامون ) دا أي كتاب عندو وكراس الغلاف ناصل …!!
أها ( مامون ) استلم الإجابة دي بي عينو و ختاها في ( سدرو ) وشات …
و لم يتردد في أن يكتب ( قلم جاف ) نفسها التي كتبها جاره الألمعي…
وتم القبض عليه بالثابتة ….وبعد التضييق والخناق
اعترف بواقعة الشف ..
ولكن لأن الورق لا يكذب ولايوجد دليل ملموس على الواقعة ولا كاميرات مراقبة تم منحة الدرجات واعتماد النتيجه ..
وكان أعلى معدل له في حياته …!!
لكن استتبع ذلك إجراءات أمنيه قضت بنقله من مكانه الى مكان آخر….!!
( تسمع نقلوهو تقول ودوه محطة السودان في ( جنيف )
مجاورًا السعيد هذه المره واحد من فردو البره إسمو ( المسلمي )
أها ( المسلمي ) دا نضيييف …..!!
مسلم ( نمرو ) كلها للقدر وليالي الشجن ….!!
ماشي سااااكت بالبركة …!!
مش ما بذيعو إسمو في النتيجه …..
زول ذاتو عارف إسمو ( المسلمي ) غير أقران السوء ديل مافي ….!!
الشنطة مليانه طعمية وتسالي …وأحسن زول بقشر
قصب سكر في السودان … !!
بعزفو زي ( الفلوت )
ومامون طبعا عارف القصة دي …زهجان زهج
( اتلما العريس على سيد الموهبة ) …!!
أها في اختبار التاريخ في الشهر الذي يليه
مامون دا جاب ١٠ / ٣٠ والمسلمي زي ( ٧ ) سبعة كدا
وكانت نتيجه الفحص إنو ( المسلمي ) ( شفا ) من
( مامون )
( شوف الدنيا دي وقت تدور تمتعك )
( والله فعلا فوق كل ذي علم عليم )
أها ( مأمون ) في الإجابة على سؤال
( من الذي فتح القسطنطينية ) …..؟؟
كتب ( فتحها المأمون بن المسلمي ) ….
تماما كما ورطه أكرم من قبل
( بقى بتجدع كمان ) ….!!
( أكرم فوق عديلو قنع من إجابة ……!!
مامون دا قنع من شنو ) ..؟؟؟
بتصدقو المسلمي كتب نفس الإجابة ….!!
( أنا ما قلت ليكم الزول دا أبيض)
( طلع مشارك في فتح القسطنطينية ) ….
أستاذ ( بابكر ) دا لذيذ كدا يوم توزيع نتيجه الاختبار
قال لي ( المسلمي ) القسطنطينية فتحا محمد الفاتح
يا مسلمي لكن مامون فتح ليك ….!!
ضحكنا ضحك …
ومنذ تلك اللحظه عرفنا إنو ( حوا ) والدة ومرات بتلد الرماد
الظاهر ناس مامون ديل كتار …!!
مامون فكرة والفكره لاتموت
عشان كدا لما زول يعمل اي مشروع وينجح …بجو بعدو مية ….تتعدد الأسماء ومامون قااااعد
يعني إذا في محل عصير ( منقة ) نجح
الشارع كان ببقى ( أصفر ) …..!!!
ويظهر ( ملك المنقة ) و( لون المنقة ) و ( الشايل المنقة )
…
وإذا في سمكة تألقت في صاج سمك
يأتي طبق السمك …وصحن السمك ….والسمك ذاااتو
( المسلمي ) دا مره قال لي إنت ( الشعيريه ) دي بزرعوها وين
؟؟؟؟
سكتا أقول شنو ..!!
تعيش إنت ويدوم خيرك ….!!
بزرعوها في وادي شعير يا مسلمي
ويضحك السمك ….!
شركة جريس لاند لخدمات الشحن المختلفة
هل لديك تعليق؟
لن نقوم بمشاركة عنوان بريدك الالكتروني، من اجل التعليق يجب عليك ملئ الحقول التي امامها *
بحث
الاصناف
معرض الصور
الاشارات
مواقع التواصل
الاخبار المشابهة
عادل الباز يكتب "رهائن لا حواضن”: تفكيك الأكذوبة
- Dr Abas
- 31 May, 2025
.jpg){kind=tracking}
عابد سيداحمد يكتب : عليكم بهؤلاء !!
- Dr Abas
- 30 May, 2025
البديل برس .. مؤسسة اخبارية مستقلة وشاملة .. شعارنا .. الدقة والشفافية والموضوعية في تناول القضايا السياسية والاقتصادية والاجتماعية والالتزام بمبادئ الصحافة الحرة.. هدفنا .. تقديم خدمة إخبارية مميزة ومختلفة.. من خلال متابعتنا للاحداث اول باول على مدار ٢٤ ساعة.. البديل برس .. منبر كل السودانيين الاراء المنشورة في الموقع لا تعبر بالضرورة عن رأي الموقع وانما عن رأي كاتبها
المقالات الاكثر شهرة
-
تعرف علي انواع فصائل دم الحيوانات
- 19 Mar, 2023
-
-
النيل يبتلع 14 شابا
- 30 Nov, -0001